كلمات شيلة عطني من وقتك دقيقه
عطني من وقتك دقيقـه مثل ماعطيتك عمر!
بس ابي اسـال ضميـرك وين اودي هالحنين!
كل يوم اقـول بكـره بس هالبكره دهر
حسبة العشـاق ماهـي مثل باق العالمين
مابي احساسـك عمـر والا سنه !والا شهر
حس فيني لو ثـلاث ايام في كل سنتين
المصيبه قلب شاعر يعرفـك من ذو الصغر
مستحيل يهد حبـك بين حين وبين حين
كان حلمـه مايهـوجـس في المفـارق والهجر
لين ماشاف الجفا ثم قال ماعذرك سمين
عادي ولو هي جـات منّك يالغـلا طعنة ظهر
انت تطعن طول عمـرك بس دايم تستعين
فالصباح طيور هجرك والمساء ضيم وسهر
وكان نمت تقوم في صدري مثل غزوة حُنين
وانت تحسبني اناظر فـ النجوم وفي القمر
قاعد اناظـر جروحـك داعبت عرق الوتين
وابن آدم في حياتـه عايش برحلة سفر
يعني اصلاً كل ابونا في الحيـاه مسافرين
بس ود الشخـص يتـرك فـوق هالدنيـا أثر
والاثـر مايتـركـه نـاسٍ عليهــا تايهين
وانت سافـر للامانـي وابن في الدنيا قصر
ماهوب قصر اليمامـه او قصر البابطين
قصرٍ يشيّد وفاك وطيبتك بين البشر
لا تفكر واجد بدنياك بكره راحلين
واعترف لي واعتذر مادام باقي لك عذر
وكان صرت موادع اترك عنْك تلويح اليدين
وبكذا حبك يزيد وتكسـب احسان وأجر
لجل ماتدمن على عادتْك مثل المدمنين
بس عندي لك رسالـه والرساله في شطر
مختصرها كلمتين وكلمتين وكلمتين
دام لله الـــدوام ودام لله الكبر
خل عنْك الكبر واتواضع مع المتواضعين